Isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut
pillugu
Inatsisartut Isumaginninnermut Suliffeqarnermullu Ataatsimiititaliaata
ISUMALIUTISSIISSUTAA
Peqqussutissatut siunnersuutip appassaaneerneqarnerani saqqummiunneqartoq
Inatsisartut Isumaginninnermut Suliffeqarnermullu Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Asii Chemnitz Narup, Inuit Ataqatigiit, siulittaasoq
Inatsisartuni ilaasortaq Ruth Heilmann, Siumut
Inatsisartuni ilaasortaq Vittus Mikaelsen, Siumut, Ruth Heilmannimut sinniisussaq
Inatsisartuni ilaasortaq Mikael Petersen, Siumut
Inatsisartuni ilaasortaq Jakob Sivertsen, Atassut
Inatsisartuni ilaasortaq Loritha Henriksen, Kattusseqatigiit
Inatsisartut Isumaginninnermut Suliffeqarnermullu Ataatsimiititaliaata UKA 2001-imi siuller-meerinerup kingorna isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut nassuiaatitai ilanngullugit misissuataarpaa.
Tusarniaanermit akissutisiat
Siunnersuutip ataatsimiititaliami suliarineqarnissaanut atugassanik tusarniaanermit akissutisiat nuutinnerinik kiisalu tusarniaanermit akissutisiat pillugit allakkiamik ataatsimiititaliaq piniarsimavoq.
Isumasioqateqarluni ataatsimiinnerit
Aammattaaq ataatsimiititaliap siunnersuummik suliarinninnerminut atatillugu Isumaginninnermut Suliffeqarnermullu Naalakkersuisoq isumasioqatigalugu ataatsimeeqatigaa. Isumasioqatigiilluni ataatsimeeqatigiinnissamut aggeqqusissut isumaliutissiissummut matumunnga ilanngussatut inganngunneqarpoq.
Siunnersuutip imarisai
Siunnersuummi pingaarnertut allannguutaasussat ataatsimiititaliap misissorpai imalu oqaaseqarfigissallugit:
Peqqussutissatut siunnersuummi erseqqissaatigineqarpoq kommunalbestyrelsip aalajangigaa Isumginninnermi Naammagittaalliuuteqartarfimmut naammagittaalliutigineqarsinnaasoq, taamaalillunilu nalornissutaasariaarutissalluni suliat kommunalbestyrelsi sinnerlugu aalajangigaasimappata politikikkut allaffissornikkulluunniit aalajangigaasimanerat apeqqutaatinnagu Isumaginninnermi Naammagittaalliuuteqartarfimmut naammagittaalliuutigineqarsinnaanerat.
Tamatuma saniatigut suliat, illersorneqarsinnaasumik tunngavissaqarsimappat aammalu aalajangiinissaq nalorninaateqanngippat Isumaginninnermi Naammagittaalliuuteqartarfimmut saqqummiunneqaqqaaratik, siulittaasup allakkatigut suliarinninneratigut aalajangiiffigineqarsinnaalernerat siunnersuutikkut periarfissinneqarpoq. Periarfissaq taanna ataatsimiititaliamit assut iluarisimaarneqarpoq, naammagittaalliuummimmi aalajangiiffigisassamik suliaqarnermut atatillugu eqaatsumik suleriaaseqarnikkut pilertortumillu aalajangiisarnikkut innuttaasut inatsisitigut illersugaanerat nukittorsarneqassammat. Taamatuttaaq naammagittaalliuummi aalajangiineq pisinnaassaaq suliaq innuttaasumut suli pingaaruteqarallartillugu.
Aammattaaq siunnersuummi aalajangersakkamik nutaamik ilanngussisoqarpoq, tassuuna Naalakkersuisut kommuunini ataatsimiititaliani ilaasortanik sulianik isumaginninnermut tunngasunik suliaqartunik pikkorissaasarnissaminnut periarfissinneqarlutik. Tamanna Inatsisartut Isumaginninnermut Suliffeqarnermullu Ataatsimiititaliaannit iluarisimaarneqarpoq. Peqqussutinik isumaginninnermut tunngasunik sukumiisumik ilisimasaqarneq innuttaasut eqqortumik ikiorserneqarsinnaanissaanni pingaaruteqarluinnarpoq.
Ataatsimiititalialli Naalakkersuisut kaammattussavai siunnersuutip aappassaaneerneqarnissaanut allannguutissatut siunnersuummik saqqummiussaqaqqullugit, taamaaliornikkut § 5-imut oqaasertaliunneqassalluni Naalakkersuisut kommuunini ataatsimiititalianik sulianik isumaginninnermut tunngasunik suliaqartunik, kommunalbestyrelsimut nutaamik qinersinerup kingorna kingusinnerpaamik ukiup ataatsip qaangiutinnginnerani, pikkorissaasarnissaminnut pisussaaffilerneqarnissaat. Tamatuma kingunerissavaa ukioq 2001-imi kommunalbestyrelsimi ilaasortanngortut nutaat 2002-mi pikkorissartinneqarnissaminnik neqeroorfigineqarnissaat.
Ataatsimiititaliap siunnersuummi § 1-imik oqaluuserinninnerminnut ilanngullugu siunnersuutip § 1, imm. 2-a sukumiisumik oqaluuseraa, taannalu ima oqaasertaqarpoq:
§ 1, imm. 2. "Naalakkersuisut nakkutilliinerup qanoq annertutiginissaanut ingerlanneqarnissaanullu erseqqinnerusumik aalajangersagaliorsinnaapput."
Ataatsimiititaliap paasinninnera malillugu nakkutiginnittuusaatitaanerup qanoq annertussuseqarnissaa nakkutiginninnerullu taassuma eqqortinneqarnerata qanoq ittuunissaa annertuumik narlonissutaapput. Taamaattumik ataatsimiititaliaq isumaqarpoq aalajangersagaq taanna erseqqissaavigineqarlunilu pinngitsoorani malitassanngortinneqartariaqartoq, taamaaliornikkut kommunit isumaginninnermut tunngasunik malittarisassanik ingerlatsinerat pillugu nakkutiginninnerup qanoq annertutiginissaanik qanorlu ingerlanneqarnissaanik malittarisassiornissamut Naalakkersuisut pisussaaffilerneqassapput.
Taamaattumik ataatsimiititaliap Naalakkersuisut kaammattussavai siunnersuutip aappassaaneerneqarnissaanut allannguutissatut siunnersuummik saqqummiussaqaqqullugit, taamaaliornikkut § 1, imm. 2 ima oqaasertalerneqaqqullugu:
§ 1, imm. 2. "Naalakkersuisut nakkutilliinerup qanoq annertutiginissaanut ingerlanneqarnissaanullu erseqqinnerusumik aalajangersagaliussapput."
Inatsisartut Isumaginninnermut Suliffeqarnermullu Ataatsimiititaliaatattaaq Inatsisartut Ombudsmandiata 2000-imut nalunaarutaani immikkoortoq 4 innersuussutigissavaa, tassanimi suliarineqarmat Namminersornerullutik Oqartussat isumaginninnerup iluani nakkutiginnittussaatitaanerannik apeqqummut tunngasumik suliaq.
Taama oqaaseqarluni ataatsimiititaliap isumaqatigiittup inassutigissavaa isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut ataatsimiititaliap siuliani kaammattuutigisai naapertorlugit Naalakkersuisut allannguutissatut siunnersuutaasa saqqummiunneqareernerisa kingorna iluseriligassamisut iluseqarluni akuersissutigineqassasoq.
Asii C. Narup
siulittaasoqVittus Mikaelsen Mikael Petersen
Jakob Sivertsen Loritha Henriksen